រឿងដ៏ល្អនេះ។ តើការដាក់បញ្ចូលបច្ចេកវិទ្យាដ៏មានតម្លៃសម្រាប់អ្នកប្រើប្រាស់កម្ពុជានេះមានឫសគល់មកពីណា?
កាលពីថ្មីៗនេះមានព័ត៌មានជាច្រើនបានចុះផ្សាយបន្តបន្ទាប់ អំពីក្រុមហ៊ុន Google បានបំពាក់ក្ដារចុច និងហ្វុនអក្សរខ្មែរនៅលើ Smartphone ដែលដើរដោយប្រព័ន្ធប្រតិបត្តិការ Android ជំនាន់ចុងក្រោយ KitKat។
មានមិត្តយុវវ័យខ្មែរជាច្រើនបានសាទរជុំវិញរឿងដ៏ល្អនេះ។ តើការដាក់បញ្ចូលបច្ចេកវិទ្យាដ៏មានតម្លៃសម្រាប់អ្នកប្រើប្រាស់កម្ពុជានេះមានឫសគល់មកពីណា?
កន្លងមកធ្លាប់មានការលើកឡើងថា ហេតុដែលក្រុមហ៊ុន Google ដែលជាក្រុមហ៊ុនយក្សផ្នែកបច្ចេកវិទ្យាមួយនៅលើពិភពលោកសម្រេចដាក់ វត្ថុដែលតំណាងជាតិសាសន៍ខ្មែរគឺ ដោយសារតែមាន Developer ខ្មែរជាច្រើនបានជ្រោមជ្រែងយ៉ាងសកម្មបំផុតលើវិស័យបច្ចេកវិទ្យាមួយ នេះ។ ប៉ុន្តែអ្វីដែលប្រាកដនោះគឺថា នេះគឺជាការដាក់បញ្ចូលការបកប្រែដែលបានផ្តល់ដោយអង្គការ វិទ្យាស្ថានបើកទូលាយ។
យោងតាមសេចក្ដីប្រកាសព័ត៌មានរបស់អង្គការវិទ្យាស្ថានបើក ទូលាយបានឱ្យដឹងថា កម្មវិធី SPICE ដែលអនុវត្តដោយអង្គការវិទ្យាស្ថានបើកទូលាយ និងមានផ្ដល់ថវិកាដោយទីភ្នាក់ងារសហរដ្ឋអាមេរិកដើម្បីអភិវឌ្ឍន៍ អន្តរជាតិ (USAID) បានសហការជាមួយក្រុមហ៊ុន Googleនៅឆ្នាំ២០១៣ ដើម្បីបញ្ចប់ការបកប្រែប្រព័ន្ធប្រតិបត្តិការទូរសព្ទ Android ជាភាសាខ្មែរ។ កិច្ចខិតខំប្រឹងប្រែងដ៏មានតម្លៃនេះ បានសម្រេចគោលដៅរបស់ខ្លួននៅពេលដែលមានការចេញផ្សាយប្រព័ន្ធ ប្រតិបត្តិការថ្មីកំណែប្រែ ៤.៤ ដែលមានឈ្មោះថា KitKat របស់ Googleកាលពីចុងខែតុលាកន្លងទៅ។
តាមសេចក្ដីប្រកាសព័ត៌មានដដែលបានឱ្យដឹងទៀតថា ការបកប្រែទូរសព្ទត្រូវបានធ្វើឡើងដោយក្រុមបកប្រែរបស់កម្មវិធី SPICE ដែលមានបទពិសោធន៍ក្នុងការបកប្រែកម្មវិធីកុំព្យូទ័រ និងទូរសព្ទជាង ៨ ឆ្នាំមកហើយ។ នៅក្នុងឆ្នាំ ២០០៥ ក្រុមនេះបានក៏បកប្រែកម្មវិធីលើស៊េរីទូរសព្ទណូគា (Nokia) លើកដំបូងជាភាសាខ្មែរបានដោយជោគជ័យនោះដែរ។
តាមពិតកន្លងទៅ ក្រុមហ៊ុន LG និង Samsung បានផ្ដល់ការបកប្រែសម្រាប់ទូរសព្ទAndroid មួយចំនួនរួចហើយដែរ ហើយម៉ូដែលទាំងនោះបច្ចុប្បន្នកំពុងចរាចរលើទីផ្សារក្នុងប្រទេស កម្ពុជា៕
សូមបន្តអាន៖ ពលរដ្ឋសាទរនិងមោទនភាពដែល Google ដាក់ក្ដារចុចនិងពុម្ពអក្សរខ្មែរនៅលើ KitKat។ ប្រភពព័ត៌មានៈ Sabay